BALACA QARA BALIQ ərəb əlifbada 2

بالاجا باليق اوزه-اوزه گئدير و فيکيرلشيردي. يولبويو تزه شئيلر گؤرور، اؤيره نيردي. شلاله نين باشي اوسته آخماسيندان هزز آلير، يئنيدن عوذوردو. کورگينده گونشين هرارتيني هيسس ائدير و مؤحکمله نيردي.

او، سونرا ائله بير يئره چاتدي کي، بورادا دره ائنله نير، سو ايسه کوللوقلارين آراسيندان آخيب گئديردي. بالاجا باليق سويون چوخالماسيندان لذت آليردي. خئيلي گئدندن سونرا او، چوخلو باليغا راست گلدي. آناسيندان آيريلاندان بري باليق گؤرمه ميشدي. بير نئچه ريزه باليق اونو دؤوره يه آلدي و سوروشدو:

–ئله بيل قريبسينيز؟

–به لي، غريبه م. اوزاق يئردن گليرم.

ريزه باليقلار دئديلر:

- هارا گئتمک فيکرينده سن؟

–ارخين قورتارديغي يئري تاپماغا گئديرم.

- هانسي آرخين؟

–بيز بونا آرخ يوخ، چاي دئييريک.

بالاجا باليق هئچ نه دئمه دي. ريزه باليقلاردان بيري ديللندي:

–خبرين وار کي، ساققا قوشو يولو کسيب؟

–خبريم وار، بيليرم…

باشقا بير ريزه باليق سوروشدو:

–ونو دا بيليرسن کي، ساققا قوشونون نه گئنيش کيسه سي وار؟

–ونو دا بيليرم.

–بونلاري بيله-بيله يئنه گئتمک فيکرينده سن؟

–به لي، بوتون بونلاري بيليرم و گئتمه لييم.

باليقلار آراسيندا سس ياييلدي کي، اوزاق يوللاردان گلميش بالاجا قارا باليق چايين قورتاراجاغيني تاپماق ايسته يير و ساققا قوشوندان دا قورخمور.

ريزه باليقلاردان بير نئچه سي بالاجا قارا باليقلا گئتمک ايسته دي، لاکين بؤيوکلرين قورخوسوندان سسلريني چيخارتماديلار. حتّی اونلارين بير نئچه سي بالاجا قارا باليغا ياناشيب قيميلداندي.

–ساققا قوشو اولماسايدي، بيز ده سنينله گئدرديک…

چايين قيراغيندا بير کند وار ايدي. کندين قادينلاري و قيزلاري چايين ايچينده قاب-قاجاق و پالتار يويوردولار. بالاجا باليق اونلارين سس-کويونه بير خئيلي قولاق آسدي و اوشاقلارين ايسلانميش بدنلرينه تاماشا ائتدي، سونرا يولا دوزلدي. او قدر گئتدي کي، آخشام اولدو. بالاجا بير داشين آلتينا گيريب ياتدي. گئجياري آييلدي و گؤردو کي، آي سويا دوشوب، هر يئري ايشيقلانديرير.

بالاجا باليق آيي چوخ ايسته ييردي. گئجه لر آي سويا دوشنده يووادان چيخيب اونونلا بير نئچه کله مه دانيشماق هسرتينديدي. آما هر دفعه آناسي آييليب اونو يوواسينا دارتار و يئنيدن ياتيرداردي. بو دفعه بالاجا باليق آيين قارشيسينا چيخدي:

–سالام، ائي منيم گؤيچک آييم!

آي دا بالاجا قارا باليغي مئهريبانليقلا قارشيلادي:

–سالام، منيم بالاجا قارا باليغيم! سن هارا، بورا هارا؟

–دونياني سياهته چيخميشام.

–دونيا چوخ بؤيوکدور، سن هر يئري گزه بيلمزسن.

–ئيبي يوخدور، باجارديغيم يئره قدر گئده جگم.

–ورگيم چوخ ايسته ييردي کي، سحره قدر يانيندا قالام، آما بؤيوک بير قارا بولود منه طرف گلير. قورخورام ايشيغيمين قاباغيني کسسين.

–ئي قشنگ آي، سنين ايشيغيني چوخ سئويرم. اورگيم ايسته يير کي، نورون هميشه يولوما ايشيق ساچسين.

–منيم باليغيم، دوزونو آختارسان منيم ايشيغيم يوخدور، ايشيغي منه گونش وئرير، من ده اونو يئره ساچيرام. بيليرسنمي کي، آداملار ياخين گله جکده اوچماق، گليب منيم اوزريمه دوشمک آرزوسونداديرلار؟

–بو مومکون دئييل!

–دوزدور، بو چوخ چتين ايشدير، آنجاق اينسان اؤز ايسته ديگين…

آي سؤزونو قورتارا بيلمه دي. قارا بولود گليب اونون اوزونو اؤرتدو، يئره قارانليق چؤکدو. قارا باليق يئنه ده تک-تنها قالدي. بير نئچه دقيقه حئيرت ايچريسينه قارانليغا باخدي. سونرا داشين آلتينا چکيليب ياتدي… سوبه تئزدن آييلاندا باشي نين اوستونده پيچ-پيچلا دانيشان بير نئچه ريزه باليق گؤردو. اونلار قارا باليغين يوخودان آييلديغيني گؤروب دئديلر:

–ساباهين خئيير!

قارا باليق اونلاري تانيدي:

–ساباهينيز خئيير اولسون!–دئدي. نهايت، آرديمجا گليب، من ديين يولا دوشدونوز؟

ريزه باليقلاردان بيري:

–به لي،–دئدي،–انجاق هله ده قورخو جانيميزدان چيخماييب.

بير باشقا باليق :

–ساققا قوشونون فيکري بيزي راحات بوراخمير،–دئيه ديلندي.

بالاجا قارا باليق:

- سيز چوخ فيکيرلشيرسينيز. هر شئيه فيکيرلشمک، اؤزو ده بير دفعه يه فيکيرلشمک دوز دئييل. يولا دوشن کيمي قورخو بيزي ترک ائده جکدير،–دئيه جاواب وئردي.

بيرليکده يولا دوشمک ايسته ديلر. گؤردولر کي، دؤوره لرينده کي سو يوخاري قاخدي، باشلاري اوزرينه اؤرتوک چکيلدي. هر يئر قارانليقلاشدي، قاچماغا ايمکان قالمادي. بالاجا قارا باليق او ساعات باشا دوشدو کي، ساققا قوشونون کيسسه سينه دوشوبدور.

بالاجا قارا باليق دئدي:

–دوستلار، بيز ساققا قوشونون کيسسه سينه دوشموشوک، لاکين خيلاص اولماق اوچون يول وار.

ريزه باليقلار آغلاييب آه-زار ائتمکه باشلاديلار.

- آرتيق بيزم قاچماقا يولوموز يوخدور! تقصير سنده دير. بيزي يولدان چيخاردين!

–يندي بيزيم هاميميزي " قورت " ائله ييب اوداجاق.

قورخونج بير قهقهه سسي ائشيديلدي. بو ساققا قوشو ايدي، گولوردو و گوله-گوله دئييردي:

- ريزه باليقلار نئجه ده گيريمه گئچيب! ها! ها! ها! ها! سيزين حالينيزا يانيرام، هئچ اورگيم گلمير، سيزي " قورت " ائله ييب اودوم. ها! ها! ها! ها!

ريزه باليقلار يالوارماقا باشلاديلار:

–هزرتي-آغايي ساققا قوشو، سنين تعريفيني چوخدان ائشيتميشيک، لوتف ائديب موبارک ديمديگينيزي بير قدر آرالاسايدينيز بورادان خيلاص اولوب موبارک ووجودونوزا دوعاچي اولارديق.

ساققا قوشو دئدي:

–من هله بو ساعات سيزي " قورت " ائله ييب اودماق فيکرينده دييلم. کيسمده احتياط باليقلار وار، بير قارنيمين آلتينا باخين.

کيسه نين آشاغي حيصه سينده اييلنميش بير نئچه ريزه باليق وار ايدي.

ريزه باليقلار بير سسله دئديلر:

–هزرت-آغايي ساققا قوشو، بيزيم گوناهيميز يوخدور، بو بالاجا قارا باليق بيزي يولدان چيخارديب…

بالاجا باليق:

–قورخاقلار!–دئدي. –سيز ائله خيال ائديرسينيز کي، يالوارماقلا بو حيله گر رحمديلليک ائديب سيزي بوراخاجاق؟

ريزه باليقلار قورخويا دوشوب دئديلر:

–هئچ نه دانشديغيني دا بيلميرسن. ايندي گؤره سن کي، حضرتي-آغايي ساققا قوشو بيزي نئجه باغيشلاياجاق و سني نئجه " قورت " ائليه جکدير!

ساققا قوشو ديللندي:

–دوغرودور، سيزي باغيشلاييرام، آنجاق بير شرطله!

–شرتينيزي بويورون، قوربان!

–ازادليغينيزي بو بوشبوغاز باليقي اؤلدورمکله الده ائده بيلرسينيز.

بالاجا قارا باليق بير قدر دالا چکيليب ريزه باليقلارا:

–ينانمايين،–دئدي،–بو حيله گر بيزي بير-بيريميزين جانينا سالماق ايسته يير، منيم باشقا فيکريم وار!…

ريزه باليقلار آزادليغا چيخماق ايستگي ايله بالاجا قارا باليغين دئديکلرينه قولاق آسماديلار، قالخيب اونون اوستونه دوشدولر. بالاجا باليق ياواش-ياواش آرخايا چکيليب:

–قورخاقلار!–دئدي،–هر حالدا گيره دوشموسونوز، قاچماغا دا يولونوز يوخدور. منه ده کي، گوجونوز چاتماز!

–بيز آزادليقا چيخماق ايسته ييريک، اونون اوچون ده سني اؤلدورمه ليگيک!

–اغلينيزي باشينيزا ييغين! مني اؤلدورسنيز ده قاچماق اوچون يول تاپا بيلميه جکسينيز. هيلگر قوشا اينانمايين!

–سن اصلا بيزيم فيکريميزي چکميرسن، بو سؤزلري اؤز جانيني قورتارماق اوجون دئييرسن!

–ئله ايسه قولاق آسين، سيزه نيجات يولو گؤستريم. من اؤزومو اؤلولويه ووروب اؤلو باليقلارين ايچريسينده گيزلنه جگم. گؤرک ساققا قوشو سيزي آزاد ائده جکديرمي؟! اگر سؤزومه قولاق آسماسانيز بو خنجرله هامينيزي قيراراق، قوشون دا کيسسه سيني پارچالاييب چيخارام. سيز ايسه …

ريزه باليقلاردان بيري اونون سؤزون کسيب:

–داها بسدير!–دئدي،–من بو سؤزلره اينانماق ايستميرم. –و، بو سؤزلري دئيه-دئيه آغلاماغا باشلادي.

بالاجا قارا باليق اونون آغلاديغيني گؤروب دئدي:

–بو آناسي نين ناز-ناز بالاسيني نييه يانينيزا ساليب گتيريبسينيز؟

او، خنجريني چيخاريب باليقلارين اوستونه جومدو. ريزه باليقلار چاره سيز قاليب بالاجا قارا باليغين تکليفيني قبول ائتديلر. يالاندان بير-بيرلري ايله دالاشماغا باشلاديلار. بالاجا قارا باليق اؤزونو اؤلولويه ووروب اوزانديقدا اونلار يوخاري قالخديلار:

–هزرتي-آغايي ساققا قوشو،–دئديلر،–فوزول قارا باليغي اؤلدوردوک.

قوش گولدو:

–چوخ ياخشي ايش گؤردونوز،–دئدي،–بونون عوضينه سيزين هامينيزي ديري-ديري اوداجاغام، قارنيمدا ايسته ديگينيز قدر گزرسينيز.

ريزه باليقلار ماجال تاپماميش بير آنداجا ساققا قوشو اونلاري اوددو. قارا باليق ايسته جلد خنجريني چکيب مؤکم ضربه ايله قوشون کيسه سيني ييرتدي و دئشيکدن چيخيب قاچدي.

ساققا قوشو آلديغي ضربه نين آغريسيندان فرياد قوپاردي، باشيني سويا ساليب بالاجا قارا باليغي يئنيدن توتماق ايسته دي. لاکين گوجو چاتمادي…

گونورتا ايدي. آرتيق نه داغ گؤرونوردو، نه دره. چاي آخيب گئنيش دوزنليکدن کئچيردي. چايين ساغ-سولوندان تؤکولن کيچيک چايلار اونون سويونو قات-قات آرتيريردي. بالاجا قارا باليق سويون چوخلوغوندان لزت آليردي. بيردن آييليب گؤردو کي، سويون ديبي گؤرونمور. او يان-بو يانا باش ووردو، هئچ يانا چيخا بيلمه دي. آز قالا غرق اولموشدو. اورگي ايسته ديگي قدر اوزندن سونرا دا الي بير يانا چاتمادي. بيردن گؤردو کي، بورنوندا ميرواري ديشلري اولان اوزون بير هئيوان ايلديريم سورعت ايله اونا هوجوم ائدير. بالاجا قارا باليق هيسس ائتدي کي، هئيوان او ساعات اونو پارچا-پارچا ائده جکدير. چاپالاييب تئز سويون اوزرينه قالخدي . بير موتدتدن سونرا سويون آلتينا ائندي. يولون ياريسيندا مينلره باليق دستسينه راست گلدي. اونلاردان بيريني ساخلاييب سوروشدو:

–قارداش، غريبه م، اوزاق-اوزاق يئرلردن گليرم. دئيين گؤروم بورا هارادير؟

او دؤنوب بالاجا قارا باليغا دئدي:

–قارداش بيزيم دنيزه خوش گليبسن!

باليقلاردان بيري دئدي:

–بوتون چايلار و آرخلار بورا تؤکولور.

باشقا بير باليق ايس:

–يندي گئت بير آز گز. سويون اوزونه چيخماق ايسته سن باليقوداندان احتياطلي اول. بو گونلر او هئچ کسدن قورخمور. هر گون دؤرد-بئش باليق اوولانماسا ياخاميزدان ال چکمير،–دئدي.

بالاجا باليق دنيز باليقلاري نين دستسيندن آرالانيب تکليکده اوزمه يه باشلادي. آز سونرا دنيزين اوستونه چيخدي. ايندي او، قيزمار گونشين يانديريجي هرارتيني اؤز کورگينده هيسس ائدير، بوندان لذت آليردي. آراملا عوذور، اؤز-اؤزونه دئييردي: " بو ساعات اؤلوم چوخ آسانليقلا منيم سوراغيما گله بيلر. ياشاماغا قادير اولدوغوم حالدا اونو اؤزومه ياخين بوراخمامالييام "

بالاجا قارا باليق فيکير و دوشونجه لريني سونا چاتديرا بيلمه دي. باليقودان گلدي، اونو گؤتوروب آپاردي. بالاجا باليق باليقودانين اوزون ديمديکلري آراسيندا چاپالاسا دا اؤزونو خيلاص ائده بيلمه دي. باليقودان ديمديگي ايله اونون بئليني ائله برک سيخيردي کي، آز قالا جاني چيخاجاقدي. ديگر طرفدن ده بالاجا قارا باليق سودان قيراقدا نه قدر ساغ قالا بيلردي؟ اؤلومون قاباغيني آلماق اوچون لاپ باليقودانين قارنينا گئتمه يه راضي ايدي، آخي، اوراداکي نميشليکدن ايستيفاده ائده بيلردي. بونا گؤره باليقودانا دئدي:

–نه اوجون مني ساغ-ساغ اودمورسان؟ من او، باليقلاردانام کي، اؤلندن سونرا بوتون بدنيم زهره دؤنر.

باليقودان هئچ نه دئمه ييب فيکره گئتدي:

" آي حوققاباز، ايسته ييرسن مني ديللنديريب آرادان چيخاسان؟ "

ساهيل گئتديکجه ياخينلاشيردي. بالاجا قارا باليق " قورويا چاتساق داها ايش بيتدي " دئيه دوشوندو و نهايت باليقودانا دئدي:

–بيليرم مني بالالارين اوچون آپاريرسان. آما ساهيله چاتانا قدر اؤله جگم، بدنيم زهر کيسه سينه دؤنه جک، بالالارينا نييه رحمين گلمير؟!

باليقودان بير آنليق فيکره گئتدي: " احتياط ياخشي شئيدير. هر احتيمالا قارشي اونو اؤزوم يئييم، بالالاريم اوچون ايسه باشقا باليق توتوم… بيردن بو، بير کلک ايشله دهر… يوخ، جانيم، هئچ بير کلک ايشله ده بيلمز " . سورا گؤردو کي، قارا باليق سوستاليب جاندان دوشور. اؤز-اؤزونه دئدي: " دئيه سن اؤلدو، آرتيق اونو اؤزوم ده يئيه بيلمرم " . ظريف و يومشاق باليغي يئمکدن احتياط ائله دي. آنجاق يئنه قارا باليغي سسله ييب اؤلوب-اؤلمه ديگيني موعين ائتمک ايسته دي. دوشوندو کي، ياريمجانديرسا يئسين، اؤلوبسه … ديمديکلريني آرالايان کيمي قارا باليق اونون آغزيندان خيلاص اولدو. باليقودان آلدانديغيني گؤروب، بالاجا قارا باليغي تقيب ائتدي. بالاجا قارا باليق هاوادا ايلديريم کيمي شيغيييب آشاغي دوشور، آغزيني آچيب دنيزين روتوبتلي هاواسيني اودوردو. نهايت سويا دوشدو. کؤکسونه يئني نفس دولدو. باليقودان دا ايلديريم سورعتي ايله شيغيييب آرخاسينجا سويا باش ووردو، آمان وئرمه ييب يئنه ده باليغي اوددو. بالاجا قارا باليق بير خئيلي واخت باشينا نه گلديگيني هيسس ائتمه دي. بيرجه اونو هيسس ائتدي کي، هر يئر قارانليق و روتوبتليدير، چيخيش يولو ايسه يوخدور. ائله کي، گؤزلري قارانليغا آليشدي، آغلاييب آناسيني ايسته ين بير ريزه باليق گؤردو. ياخينلاشيب اونا نصيحت وئردي:

–قالخ آياغا، آي بالاجا ! باشينا چاره قيلماق حاقيندا فيکيرلش، آغلاماقدان، آناني چاغيرماقدان بير شئي چيخماز.

ريزه باليق سوروشدو:

–سن کيمسن؟ مگر گؤرمورسن گئت-گئده محو اولورام؟ آنا… آي آنا، هارداسان، ايمداديما چات! داها من سني گؤره بيلمييه جگم، آنا!

بالاجا قارا باليق:

–داها بسدير، جانيم،–دئدي،–سن بوتون باليقلاري روسواي ائله دين.

ريزه باليق آغلاماغينا آرا وئرن کيمي بالاجا قارا باليق دئدي:

–من باليقوداني اؤلدوروب بوتون باليقلاري آزاد ائتمک فيکرينديم. سني اونون قارنيندان خيلاص ائدندن سونرا بونو حياتا کئچيرمک ايسته ييرم.

–سن اؤزون اؤلومله البياخاسان. باليقوداني نئجه اؤلدوره بيلرسن؟

بالاجا قارا باليق خنجريني گؤستريب دئدي:

– بونلا اونون قارنيني جيراجاغم. هله ليک منه قولاق آس، گؤر نه دئييرم. من باليقودانين قارنيندا او طرف-بو طرفه گئديب اونون عصبلري ايله اويناياجاغام. بو زامان او مني مسخره يه قويوب باشلاياجاق قهقهه چکيب گولمه يه، ائله کي، ديمديکلريني آچيب گولمه يه باشلادي، جلد اؤزونو باييرا آت.

–بس سن؟

–منيم فيکريمي چکمه. بو بدجينسي اؤلدورمه ميش باييرا چيخاسي دئييلم.

بالاجا قارا باليق بو سؤزلري دئييب باليقودانين قارنيندا او طرف-بو طرفه وار-گل ائتمه يه باشلادي. ريزه باليق ايسه اونون آغزيندان باييرا آتيلدي و سويا دوشدو. چوخ گؤزله دي، خيلاصکاريندان خبر چيخمادي. بيردن گؤردو کي، باليقودان هاوادا ماياللاق ووروب فرياد قوپارير…نهايت، او مووازينتيني ايتيريب شاپپيلتي ايله سويا دوشدو، يئنه بير قدر چاپالاياندان سونرا طاقتدن دوشدو. لاکين بالاجا قارا باليقدان يئنه ده خبر چيخمادي و ايندييه قدر ده بير سس-سوراق يوخدو.

بورادا قوجا باليق ناغيليني بيتيردي. اوزونو اون بير مين دوققوز يوز دوخسان دوققوز نوه و نتيجه سينه توتوب دئدي:

–داها ياتماق واختيدير، بالالاريم، گئدين ياتين!

نوه-نتيجه لري اوندان سوروشدولار:

–ننجان، آخي سن بالاجا قارا باليغين باشينا سونرا نه لر گلديگيني دئمه دين؟

قوجا باليق دئدي:

–او دا صاباحکي گئجه يه قالسين، بالالاريم. آرتيق ياتماق واختيدير. گئجنيز خئيره قالسين!

اون بير مين دوققوز يوز دوخسان دوققوز بالا باليق بير آغيزدان: –گئجنيز خئيره قالسين!–دئدي و ياتماغا گئتدي. ننه ني ده يوخو آپاردي. بالاجا قيزيل باليق ايسه نه قدر چاليشديسا ياتا بيلمه دي. صوبحه ده ک دنيز باره ده فيکيرلشدي…

araz1385 : Bölməsiz : Şərhlər(1) : Mart 21, 2009 0:53